መግቢያ

በአመሰራረቱ የሥራ ሚኒስቴር ተብሎ የተሰየመው መስሪያ ቤት ከ 1889 ዓ.ም ጀምሮ በአዋጅ የመጀመሪያዎቹ
የካብኔ ሚኒስትሮች ሲቋቋም በመስራችነትም አንዱ ሆኖ በታሪክ ሰነዶች ተመዝግቦ ይገኛል። ይህ አንጋፋ
መንግስታዊ ተቋም 116 ዓመታትን ውጣ ውረድ ተጉዞ በማዘመን እዚህ ደርሷል። በዳግማዊ ዐፄ ምኒልክ
ዘመን መንግስታዊ ሥራዎችን ለማዘመን እንዲረዳ ታስቦ የሚኒስትሮቹ ምክር ቤት ሰብሳቢ ጠቅላይ ሚኒስትር
ፊታውራሪ ሀብተ ጊዮርስ ዲነግዴ ሆነው ሹመት ተሰጣቸው።

የሥራ ሚኒስቴር (ከ1900 ዓ.ም – 1928 ዓ.ም) በተለያዩ ጊዜያት የስያሜ ለውጥ ሲያደረግ የቆየ ሲሆን
ድርሻው የከተማ ቦታን፣ መንገድና ውኃ ዝርጋታዎችን፣ ድልድይ ግንባታንና የማዘጋጃ ቤታዊ ኁነቶችን
የማስተዳደርና የመከታተል ኃላፊነት ነበር። በፋሽት ኢጣልያ ወረራ ዘመን (ከ 1928 ዓ.ም – 1933 ዓ.ም) ተጠሪነቱ
ሮም ከሚገኘው የሥራ ሚኒስቴር የአቢሲኒያ አዲስ አበባ ጎቨርነሬት (ቪስሮይ) ይወከል የነበረ ሲሆን ከተሾሙት
መካከል ኤንሪኮ ቸሩሊ እና ጁሊሞ ናዚ የተሰኙ ተሿሚዎች ይጠቀሳሉ። ከ1933 ዓ.ም እስከ 1935 ዓ.ም ባለው
ጊዜ ደግሞ ሀገራችን በእንግሊዝ ሞግዚትነት የቆየበት ወቅት ነበር።

ከ1935 ዓ.ም – 1950ዎቹ ባሉት ጊዜያት ደግሞ እንደ አዲስ የሥራና መገናኛ ሚኒስቴር በሚል ሲቋቋም
በዋናነት የከተማ ቦታ ልማት፣ ኤሌክትሪክ ኃይል፣ የመንገድ ትራንፖርትና ሲቪል አቬሽን ሥራዎችን የሚመሩ
ዲሬክተሮች አካቶ በመያዝ ነበር። አልፎ አልፎ በሀገር ግዛት ሚኒስቴር ሥር የማዘጋጃ ቤቶች ዋና ማደራጃ ሥር
የከተሞች ፕላን ሥራዎችን እንዲከናወን ይደረግ የነበረበት ሁኔታም ነበር። ቀጥሎም ከ 1966 ዓ.ም አብዮት
የሥርዓት ለውጥ ወዲህ ስያሜው የሥራና ከተማ ልማት ሚኒስቴር እንዲሁም የከተማና ቤት ሚኒስቴር እየተባለ
ሲጠራ ቆይቷል። ከ1994 ዓ.ም – 1998 ዓ.ም በፌዴራል ጉዳዮች ሚኒስቴር ሥር በምክትል ሚኒስቴር ማእረግ ሹመት ይመራ ነበር። በኋላም ራሱን ችሎ የሥራ የከተማ ልማት ቤቶችና ኮንስትራክሽን ሚኒስቴር በሚል ተሰይሟል። ከ 1998 ዓ.ም – 2008 ዓ.ም ድረስ የከተማ ልማትና ቤቶች ሚኒስቴር በሚል ተሰይሟል፡፡ ከ2008
ዓ.ም – 2010 ዓ.ም የከተማና ኮንስትራክሽን ሚኒስቴር እንዲሁም ከ2010ዓ.ም – 2014 ዓ.ም ድረስ የከተማ
ልማት ሚኒስትር እንዲሁም ከ 2015 ዓ.ም ወዲህ ደግሞ በተሻሻለው የማቋቋሚያ ስያሜ የከተማና መሠረተ ልማት ሚኒስቴር እየተባለ ይጠራል።